एक अर्ब संकलन गर्ने मेची–काली विश्व अभियानको एक बर्ष

८० लाख संकलन

  सुमेरु संबाददाता

सोलुखुम्बु – सोलुखुम्बु बहुमुखी क्याम्पसले अघिल्लो बर्ष देखि शुरु गरेको मेची–काली विश्व अभियान अन्तरगत ८० लाख रुपियाँ सहयोग संकलन गरिएको छ । २०७५ फागुन ४ गते राष्ट्रपति विद्यादेवी भण्डारीले उद्घाटन गरेको अभियानको एक वर्षको प्रगति विवरण प्रस्तुत गर्दै क्याम्पस प्रमुख उद्धवकुमार शर्माले ३५ लाख ९३ हजार ६१७ रुपैँया अभियानको बैँक खातामा जम्मा भएको जानकारी दिए । आईतबार मात्रै ४४ लाख २८ हजार ८२२ रुपैँया सहयोग संकलन भएको छ ।

अभियानमा हालसम्म एक हजार ९०३ जनाले सहभागिता जनाएका छन् भने धेरैले प्रतिबद्धता जनाएका छन् । सोलुदूधकुण्ड नगरपालिकाका मेयर नाम्गेलजाङ्बु शेर्पाले अभियानलाई ३० लाख रुपियाँ सहयोग हस्तान्तरण गरे । अभियानको शुभारम्भमा नगरपालिकाले एक करोड सहयोग गर्ने बचन अनुसार पहिलो किस्ताको रुपमा ३० लाख रकम प्रदान गरिएको हो । बाँकी रकम आगामी दुई आर्थिक बर्षमा प्रदान गर्ने बचन दिए । मेयर शेर्पाले प्राविधिक शिक्षाबाट शैक्षिक बेरोजगारीको संख्या न्यूनिकरणका लागि सहयोग पुग्ने बताए ।

आईतबार क्याम्पस परिसरमा भएको प्रगती सार्वजनिक तथा ईच्छादान कार्यक्रममा उद्योग व्यवसायी तथा काँग्रेस नेता प्रकाशसिंह कार्कीले १० लाख व्यक्तिगत सहयोग प्रदान गरेका छन् । सहयोग हस्तान्तरण गर्दै समाजसेवी कार्कीले अभियानमा धेरैभन्दा धेरै जनसहभागी गराउन आग्रह गरे । आफूले पनि सक्दो कोशिस गर्ने उनको भनाई छ । कार्यक्रममा सबै भन्दा ठूलो रकम दिने, धेरै जनसहभागिता गराउने र धेरै रकम सङ्कलन गर्ने तीन÷तीन जनालाई सम्मान गरिएको छ ।

धेरै रकम सङ्कलन गर्नेमा क्रमश क्याम्पस प्रमुख उद्धवकुमार शर्मा, बबिता राई र निरञ्जन कट्टेल, धेरै सहभागिता गराउनेमा निरञ्जन कट्टेल, पुष्पबाबु बास्तोला र डिल्लीराम बास्तोला तथा गएको वर्षमा ठूलो रकम दिन थाक्ची शेर्पा, बबिता राई, पत्रकार लाक्पा शेर्पा र उद्धवकुमार शर्मालाई दोसल्ला ओढाएर सम्मान गरिएको छ ।

क्याम्पस सञ्चालक समितिका सदस्य आङगेलु शेर्पाले बदलिँदो परिस्थिति अनुसार शैक्षिक जनशक्ति उत्पादन गर्न नसक्दा बेरोजगारी समस्या बढेको भन्दै अब श्रम बजारको माग अनुसार जनशक्ति उत्पादनमा यो अभियानले पुरा गर्ने विश्वास व्यक्त गरे ।

सोलुदूधकुण्ड नगरपालिकाकी उपमेयर कल्पना राईले यो महत्वपूर्ण अभियान भएकाले जसरी पनि सफल बनाउनुपर्ने भन्दै गरिब तथ जेहेन्दार विद्यार्थीलाई ठूलो सहयोग पुग्ने बताईन् । प्रमुख जिल्ला अधिकारी रमा आचार्यले पवित्र उद्देश्यले सञ्चालन भएकाले सफल बनाउन सबैलाई आग्रह गर्दै प्रशासनले सक्दो सहयोग गर्ने प्रतिबद्धता व्यक्त गरिन् । सोलुदूधकुण्ड नगरपालिकाका प्रवक्ता शारदामाया तामाङले शिक्षा जस्तो पवित्र कामका लागि सक्दो सहयोग गर्ने प्रतिबद्धता जनाईन् ।

५ बर्षमा अभियानबाट एक अर्ब रुपियाँको अक्षय कोष स्थापना गर्ने लक्ष्य लिइएको छ । क्याम्पस प्रमुख शर्माले विश्वको शैक्षिक हब बनाउने भन्दै सबैभन्दा बढी जनसहभागितामा सञ्चालित क्याम्पसको हैसियतमा गिनिज बुक अफ वल्र्ड रेकर्डस्मा नाम लेखाउने लक्ष्य रहेको बताए । सहयोग जुटाउने क्रममा स्वदेश ता विदेशमा निरन्तर भइरहेको र लाखौँको प्रतिबद्धता आइरहेको शर्माको भनाई छ ।

आगामी पाँच बर्षभित्र पाँच लाख नागरिक, पाँच हजार सरकारी तथा गैरसरकारी संघसंस्था, कार्यालयहरु र कम्तीमा विश्वका २५ राष्ट्रका नागरिकलाई अभियानमा सहभागी गराउने लक्ष्य रहेको उहाँको भनाइ छ । क्याम्पसले ट्राभल्स, टुरिजम् र माउन्टेनियरिङ कोर्समा ७७ जिल्लाबाट गरिब तथा जेहेन्दार छात्र छात्रा, विभिन्न २५ राष्ट्रका २५ जना र अति पिछडिएका समुदायबाट १३ जना गरी पाँच सय जनालाई खान बस्न सहित निःशुल्क उच्च प्राविधिक शिक्षा प्रदान गर्ने भएको छ ।

उच्च प्राविधिक शिक्षाको मूलधारमा आउन नसकेका, जेहेन्दार, जनजाति, दलित, गरिब, महिला र अपाङ्गता भएकाहरुलाई बार्षिक पाँच लाख छात्रबृत्ति वितरण गरी उच्च प्राविधिक शिक्षा प्राप्त गर्ने अवसर दिने क्याम्पसले जनाएको छ ।

तपाईको प्रतिक्रिया

सम्बन्धित समाचार